ഈ കോടതികള്ക്ക് ഒന്നല്ല ഒരായിരം തവണയാണു ഭരണ വിപ്ലവപ്പാര്ട്ടി തോറ്റുകൊടുത്തത്. കൊള്ളാവുന്നൊരു നിയമമുണ്ടാക്കി സ്വാശ്രയ മുതലാളിമാരെ മൂലക്കിരുത്താമെന്നു വച്ചപ്പോ അതിലും തലയിട്ടു പൊളിച്ചു കൈയില് തന്നു വിധികര്ത്താക്കള്. ഇപ്പോള് റോഡിലൂടെ പോവുന്ന പിള്ളേരുപോലും വായില് തോന്നുന്നതു വിളിച്ചുപറയുന്നതു കേള്ക്കേണ്ട ഗതികേടിലായി. ഏറ്റവും ഒടുവില് ചില `വിവരദോഷങ്ങള്'?എഴുതി എഴുന്നള്ളിച്ച എന്ജിനീയറെ അങ്ങ് തെലുങ്കുദേശത്തേക്കു നാടുകടത്താനിരുന്നതാണ്. എന്നിട്ടോ? പടച്ചവനെയും പടപ്പിനെയും പേടിയില്ലാത്ത ഞമ്മളെ ചൊറിയാന് ചിലര് കോര്ട്ട് ഓഡറും കൊണ്ടു വന്നിരിക്കുന്നു. ഏതു നോട്ടുകെട്ടിലേക്കാണ് ഇവര് നോക്കിയതെന്നു പറഞ്ഞ് വിവാദത്തിന്റെ പാലൊളി വിതറാനൊന്നും ഉനി നമ്മെ കിട്ടില്ലെങ്കിലും അങ്ങനെയങ്ങു വിട്ടുതരുന്ന യാതൊരു പ്രശ്നവും ഉദിക്കുന്നില്ല കെട്ടോ. ഓര്മയില്ലേ സ്വദേശാഭിമാനിയെ. ശ്രീമൂലത്തിനെതിരേ എഴുതിയതുമൂലം മൂപ്പരെയും പൊണ്ടാട്ടിയെയും മഹാരാജന് മദ്രാസിലേക്കാണു പറഞ്ഞുവിട്ടത്. ഭരിക്കുന്നവനെ ഭരിക്കാന് വന്നാല് ഇങ്ങനെയിരിക്കും. തന്നെ എതിര്ത്തിരുന്നവരെ മുഴുവന് കൊടും തണുപ്പുള്ള സൈബീരിയയിലേക്കു നാടുകടത്തിയാണു പണ്ട് സ്റ്റാലിന് സഖാവ് പകരംവീട്ടിയത്. ഇനി വേഷംമാറി വല്ല മെക്സിക്കോയിലും കഴിഞ്ഞുകൂടാനാണു പരിപാടിയെങ്കില് ട്രോട്സിക്കെതിരേ പ്രയോഗിച്ചതുപോലൊരൊന്നാന്തരം മഴു കണ്ണൂരില് നിന്നിറക്കാനും മടിയില്ല. അതിനാല് നാവടക്കി പണിയെടുത്തോളണം. ഇതിനാണ് ഉത്തരവെന്നു മലയാളത്തില് പറയുക. ആഗോള സാമ്പത്തിക മാന്ദ്യത്തിന്റെ കാലമാണിതെന്നും മറക്കണ്ട. പണിപോയാല് പോയതു തന്നെ.
